Ертең Катонқарағай ауданына қарасты Топқайың ауылы таза ауыз суға қосылады. Бұл туралы аудан әкімі Данияр Дюсембаев айтты, деп хабарлайды F16.kz.
Жүзден астам түтін бар Топқайың ауылына 2021 жылы су тартыла бастағанда халықтың қуанышында шек болмаған. Алайда, бұл қуаныш көпке созылмады. Жұмыстар аяқсыз қалып, тұрғындар «Ақбұлақтың» игілігін көре алмады. Содан бері халық өзеннен су тасып ішіп келеді.
Ертең 4 жыл бұрын құрылысы басталған Катонқарағайдағы дене шынықтыру-сауықтыру кешені мен Топқайыңдағы ауыз су желісі ертең іске қосылады, — деп атап өтті аудан әкімі.
Айта кетейік, Мемлекет басшысы 2025 жылы Қазақстан халқын 100 пайыз таза ауыз сумен қамтуды тапсырған. Катонқарағай әкімі бұл меже ауданда толық орындалғанын айтады.
Топқайыңдағы құрылысқа мемлекеттен 77 миллион теңге қарастырылған. Қаражатты игеріп, ел игілігіне берсек, аудан 100 пайыз сумен қамтылады. Онымен жұмыс тоқтап қалмайды, бұрын жоспарда болмаған, жаңадан салынған үйлерге су тартуды жалғастырамыз, — дейді ол.
