Мемлекет басшысының тапсырмасы бойынша Қазақстанда бірыңғай заманауи мектеп инфрақұрылымы форматына көшу үшін 1 300-ге жуық мектепте реновация бағдарламасы жүзеге асырылуда. Бұл туралы ҚР Оқу-ағарту министрлігінің баспасөз қызметі хабарлайды, деп жазады F16.kz.
– Биыл еліміз бойынша 245 мектепте кешенді реновация жүргізілуде, оның 134-інде жұмыстар толық аяқталған. Жаңа оқу жылының басынан бері 130 мыңнан астам қазақстандық оқушы жаңартылған, жайлы және қауіпсіз мектептерде білім алуда, – деп хабарлайды дерек көзі.
Реновация бағдарламасы аясында мектеп ғимараттарына күрделі жөндеу жүргізу, пәндік кабинеттермен жабдықтау, мектеп жиһазындарын жаңарту, талшықты-оптикалық байланыс желілеріне қосу, спорт залдарын, кітапханалар мен асханаларды жаңғырту, заманауи қауіпсіздік жүйелерімен жабдықтау, сондай-ақ мектеп аумақтарын жаңа стандарттарға сай абаттандыру қарастырылған.
Жоба үш жылда жүзеге асырылады деп жоспарланып отыр. Нақтырақ айтсақ, 2025 жылы – 245 мектеп, 2026 жылы – 434 мектеп, 2027 жылы 552 мектеп жаңартылмақ. Бұған қоса 2028-2029 жылдары Жамбыл облысындағы тағы 67 мектепте жаңарту жұмыстары жүргізіледі.
