Өскеменде кезекті ауыл шаруашылығы өнімдерінің жәрмеңкесі өтті. Бұл жолы өскемендіктер мен қала қонақтарына өз өнімдерін Үлкен Нарын ауданының шаруа қожалықтары мен кәсіпкерлері ұсынды, деп хабарлайды F16.kz.
ШҚО әкімдігі таратқан ақпаратқа сенсек, бұл жолы Үлкен Нарын ауданының алты ауылдық округінен барлық ветеринариялық және санитариялық талапты сақтай отырып, 720 келі жылқы еті, 1,8 тонна сиыр еті, 300 келі қой еті, сондай-ақ түрлі сорттағы бал, 300 литр күнбағыс майы, қымыз, картоп, сүт пен сүт өнімдері, сары май және басқа да тағамдар әкелінді.
Жәрмеңкеде өнімдердің бағасы нарықтағыдан 15-18%-ға төмен деңгейде белгіленіп, сатып алушылардың зор сұранысына ие болды.
Жалпы, Үлкен Нарын ауданының жәрмеңкесі Өскемен қаласының тұрғындары мен қонақтары арасында дәстүрлі түрде үлкен сұранысқа ие. Бұл аудан өнімдері жоғары сапасымен, табиғилығымен және экологиялық тазалығымен, сондай-ақ адам денсаулығына пайдалы болуымен ерекшеленеді.
– Бұл шараның басты мақсаты – тұрғындарды қолжетімді бағадағы сапалы әрі экологиялық таза өніммен қамтамасыз ету, – деп атап өтті Үлкен Нарын ауданы әкімінің орынбасары Нұртуған Маратұлы.
Мерекелік көңіл күй қалыптастыру мақсатында аудан өнерпаздары келушілер назарына концерттік және ойын-сауық бағдарламаларын ұсынды.
