«Таза Өскемен» коммуналдық мемлекеттік кәсіпорнының бұрынғы басшылығы бюджет қаражатын жымқырды деген күдікке ілінді. Қазір сотқа дейінгі тергеп-тексеру жүргізіліп жатыр. Бұл туралы Қаржылық мониторингі агенттігінің Шығыс Қазақстан облысы бойынша департаменті мәлім етті, деп хабарлайды F16.kz.
Ведомствоның ақпаратына сүйенсек, күдіктілер қатарында кәсіпорынның бұрынғы директоры мен оның орынбасары, сондай-ақ жеке кәсіпкер бар. Олар лауазымын пайдаланып 2022-2023 жылдар аралығында мемлекеттік сатып алу рәсімдерін өткізбей бюджет қаражатын жүйелі түрде өздерімен байланысы бар коммерциялық құрылымдардың есепшотына заңсыз аударған. Қылмыстық схеманың мәні – материалдарды жеткізу және техниканы жалға алу бойынша жалған құжаттар рәсімдеуде болған. Атап айтқанда, құжаттарда жол жөндеуге арналған битум мен құм сатып алу, суды соруға арналған арнайы техника жалдау, сондай-ақ бұған дейін орнатылған 23 аялдама павильонын жасауға қажетті материалдар сатып алу туралы жалған деректер көрсетілген. Кейін бұл қаражат жеке кәсіпкер арқылы қолма-қол ақшаға айналдырылып, схемаға қатысушылар арасында бөлінген. Келтірілген залалдың жалпы сомасы 120 млн теңгеден асты.
Қылмыстық жолмен алынған табысқа күдіктілер Өскемендегі қымбат тұрғын үй кешенінен пәтер, «BMW X6M» және «Subaru Forester» автокөліктерін, сондай-ақ жер учаскелерін сатып алған. Аталған мүлікке сот санкциясымен тыйым салынды. Кәсіпорынның бұрынғы директорына қатысты бұлтартпау шарасы ретінде екі ай мерзімге қамауға алу түріндегі шара қолданылды. Тергеу жалғасып жатыр, — деп хабарлады ҚМА баспасөз қызметі.
Қылмыстық-процессуалдық кодекстің 201-бабына сәйкес өзге ақпарат жария етуге жатпайды.
