Күн райының күрт өзгеруіне байланысты Өскеменнің коммуналдық қызметтері қызу жұмысқа кірісті, деп хабарлайды F16.kz.
Қарашаның 4-інен 5-іне ауған түні қалада қар аралас жаңбыр жауып, ауа температурасы төмендеді. Көшелерде көктайғақ пайда болды. Бұл жағдай көліктер мен жаяу адамдардың жүруіне қиындық туғызды.
Бүгін таң сәріден «Таза Өскемен» ұйымының барлық жедел қызметтері көктайғаққа қарсы жұмысты бастап кетті. Бірінші кезекте көпірлердің үсті, көліктер және жаяу адамдар көп жүретін жолдар, өрлі-еңісті учаскелер, қиылыстар назарға алынып, тайғаққа қарсы материалдар қолданылды. Ондағы негізгі мақсат – адамдардың қауіпсіз қозғалысын қамтамасыз ету.
Жүргізушілерден жылдамдықты азайтуға және қауіпсіз қашықтықты сақтауға, ал жаяу жүргіншілерден абай болуға және тайып кетпейтін, берік аяқ киім киюді сұраймыз, – деп жазды «Таза Өскемен».
Туындаған сұрақтар бойынша диспетчерлік қызметке 8 7773318536 телефон нөмірі арқылы хабарласуға болады.
