Шығыс Қазақстан облысында кәсіпкерлікті қолдаудың жаңа өңірлік бағдарламасы – «Шығыс бизнес» іске қосылды. Бағдарлама шағын және орта бизнесті дамытуда негізгі құралдардың біріне айналып, өңір экономикасының сұранысқа ие әрі болашағы зор бағыттарына серпін береді, деп хабарлайды F16.kz.
Бұл туралы облыстың кәсіпкерлік және өнеркәсіп басқармасы басшысының орынбасары Досжан Болатбек өңірлік коммуникациялар қызметінде өткен баспасөз мәслихатында мәлім етті.
Аталған бағдарламаны облыс әкімінің тапсырмасына сәйкес, кәсіпкерлік және өнеркәсіп басқармасы, кәсіпкерлер палатасы, «Ертіс» ӘКК АҚ және «Oskemen-Atameken» МҚҰ бірлесіп әзірледі. Оның басты ерекшелігі – несиені 7% жылдық мөлшерлемемен беруінде. Несие қаражаты инвестициялық жобаларды іске асыруға және айналым қаражатын толықтыруға жұмсалады. Қаржыландыру облыстық бюджет пен жеке инвестициялар есебінен жүргізіліп, кәсіпкерлерді мейілінше көбірек қамтиды. Оның ішінде Риддер мен Өскеменге қарасты ауылдық округтерде тіркелген кәсіпкерлерге де мүмкіндіктер ашылады, — деді Досжан Болатбек.
Бағдарлама аясында қаржыландыру екі бағыт бойынша жүзеге асырылады:
- 20 000 АЕК-ке дейінгі жобалар – «Oskemen-Atameken» МҚҰ арқылы;
- 20 000 АЕК-тен асатын жобалар – «Ертіс» ӘКК АҚ арқылы.
Несие беруде келесі бағыттарға басымдық берілген:
- моноқалалардағы қызмет көрсету саласы;
- ағаш өңдеу өнеркәсібі;
- балық шаруашылығы және аквамәдениет;
- өзен кеме қатынасы, кеме жасау және жөндеу;
- жабдықтар мен арнайы техника өндірісі;
- тау шаңғысы туризмі;
- қонақ үйлер мен эко-демалыс базаларын салу;
- марал шаруашылығын дамыту;
- фармацевтика саласында фитотерапиялық препараттар өндіру.
Облыстың кәсіпкерлік және өнеркәсіп басқармасы атап өткендей, «Шығыс бизнес» бағдарламасы жаңа жұмыс орындарын құруға, инвестиция тартуға және өңір экономикасы ең қажет ететін жобаларды қолдауға мүмкіндік береді.
