Бүгін А.С. Пушкин атындағы облыстық кітапханада «Зорлық-зомбылықсыз 16 күн» халықаралық акциясы аясында «Әйел теңдігі – әлем теңдігі» атты мотивациялық тренинг өтті, деп хабарлайды F16.kz.
Шараны Қазақстан психологтар одағының мүшесі, Орта Азия психоаналитиктер қоғамының аппликанты, психология ғылымдарының магистры, отбасы психологы Назигүл Таубақұлова жүргізді.
Тренинг барысында тұрмыстық зорлық-зомбылықтың түрлері, оның психологиялық әсері, әйелдің өзін-өзі бағалауы, өзін жақсы көру дағдылары және әйел энергиясы туралы маңызды ақпарат берілді. Қатысушыларға өзін-өзі бағалауға арналған тапсырмалар мен рефлексиялық сұрақтар ұсынылып, өз ішкі күйін тануға, өз құндылығын сезінуге бағытталған жеке және топтық жаттығулар орындалды.
Отбасы – адам баласының алтын діңгегі. Әйелдің өзін бағалауы мен ішкі үйлесімі жанұяның берекесіне әсер етеді. Осы шарада өз ресурстарымызды танып, эмоционалдық жағынан да, өмір сапасын жақсартуға қатысты да жаңа ақпараттар алдық, — дейді қатысушылар.
Шараға қатысушыларға салауатты қарым-қатынас қалыптастыру, эмоционалдық қауіпсіздік, құқықтық сауаттылық және отбасындағы өзара түсіністікті арттыру бойынша кеңестер берілді.
