Қазақстан Республикасы Стратегиялық жоспарлау және реформалар агенттігі Ұлттық статистика бюросының мәліметінше, Қазақстанда жеңіл электромобильдер саны тұрақты өсіп келеді, деп хабарлайды F16.kz сайты.
2026 жылғы 1 маусымдағы жағдай бойынша елімізде 24 634 жеңіл электромобиль тіркелген. Бұл өткен жылдың сәйкес кезеңімен салыстырғанда 55,6 пайызға көп. Бір жыл бұрын республика бойынша 15 835 электромобиль есепте тұрған.
Электромобильдердің басым бөлігі Алматы қаласында шоғырланған. Қазіргі таңда мегаполисте 15 280 электромобиль тіркелген, бұл республикадағы жалпы көрсеткіштің 62 пайызын құрайды.
Электромобиль саны бойынша көшбасшы өңірлердің үштігіне Астана қаласы мен Алматы облысы да енді. Елордада 2 885, ал Алматы облысында 1 589 жеңіл электромобиль тіркелген.
Жеңіл электромобильдер Қазақстанның барлық өңірінде бар болғанымен, олардың таралуы біркелкі емес. Ең төмен көрсеткіш Абай облысында тіркелген, мұнда 78 электромобиль есепте тұр. Ал Ұлытау облысында бұл көрсеткіш 41 бірлікті құрайды.
Мамандардың айтуынша, электромобильдер санының артуы халықтың экологиялық таза көлікке деген қызығушылығының өсуімен, сондай-ақ елімізде электркөліктерге арналған инфрақұрылымның біртіндеп дамуына байланысты. Бұл үрдіс алдағы уақытта да жалғасады деп күтілуде.
