2026 жылдың алғашқы алты айында Өскемен қаласында қолайсыз метеорологиялық жағдай (ҚМЖ) 40 күн бойы тіркелді. Бұл туралы Өңірлік коммуникациялар қызметінде өткен брифингте Шығыс Қазақстан облысы бойынша Экология департаменті басшысының орынбасары Әсет Бауыржанұлы мәлімдеді, деп хабарлайды F16.kz сайты.
Спикердің айтуынша, қолайсыз метеорологиялық жағдай кезінде атмосферадағы ластаушы заттардың таралуы баяулап, олардың жерге жақын қабатта шоғырлану қаупі артады. Бұған желдің әлсіреуі, ауа алмасуының төмендеуі және температуралық инверсия сияқты табиғи құбылыстар әсер етеді. Соның салдарынан ауа сапасы уақытша нашарлауы мүмкін.
Есепті кезеңде қолайсыз метеорологиялық жағдай қаңтарда – 15 күн, ақпанда – 10 күн, наурызда – 3 күн, сәуірде – 5 күн, мамырда – 3 күн және маусымда – 4 күн тіркелген.
Осындай кезеңдерде өңірдегі өндіріс орындары атмосфераға шығарылатын зиянды заттардың көлемін азайтуға бағытталған арнайы іс-шараларды жүзеге асырады. Бұл жұмыстар экологиялық талаптарға сәйкес жүргізіледі.
Сонымен қатар, Экология департаменті атмосфералық ауаның жай-күйіне тұрақты мониторинг жүргізіп, кәсіпорындардың экологиялық талаптарды сақтауын бақылауда ұстайды.
Департамент өкілдерінің айтуынша, қолайсыз метеорологиялық жағдай кезінде шығарындылар көлемін азайту ауа сапасын жақсартуға, тұрғындардың денсаулығын қорғауға және өңірдің экологиялық қауіпсіздігін қамтамасыз етуге ықпал етеді.
