Шығыс Қазақстан облысының шалғай ауылдарында интернет мәселесі әлі күнге дейін өзекті болып отыр. Байланыс нашар болғандықтан, қытайлық операторларға қосылған шекаралық аудан тұрғындары бар. Облыс әкімі Нұрымбет Сақтағанов бұл мәселе қашан шешілетінін айтты, деп хабарлайды F16.kz.
Орталық коммуникациялар қызметі алаңында өтіп жатқан брифинг барысында журанлистердің бірі Марқакөл халқын толғандырған мәселені көтерді. Бүгінде шекаралық ауданның кей ауылдары қытайлық операторларға қосылуға мәжбүр. Алайда, ол жедел қызметтерге қоңырау шалуға және онлайн қызметтерді пайдалануға кедергі келтіреді.
Сапалы интернет – көптеген өңірге қатысты мәселе. Соған сәйкес, тиісті Жол картасы әзірленген. Оның аясында 2027 жылдың соңына дейін барлық елді мекендер жоғары жылдамдықты интернетпен қамтылуға тиіс. Бүгінде Марқакөлдің тоғыз ауылында интернет бар, алты ауылда Altel, Beeline компанияларымен бірлесіп жұмыс істеп жатырмыз. Мектептерде Starlink қондырғылары орнатылған. Ауыл ішіндегі байланыс және республикалық маңызы бар жолдардағы интернет мәселесін министрлікпен бірлесіп шешіп жатырмыз. 2027 жылға дейін бұл мәселе 100 пайыз шешіледі, — деді әкім
Сондай-ақ облыс әкімі бүгінде тұрғындардың 97%-ы желіге қосылғанын атап өтті.
Биыл 56 ауыл интернетпен қамтылады, қалған 66 шағын елді мекен 2027 жылға дейін республикалық Жол картасы бойынша интернетпен қамтамасыз етіледі. Республикалық жолдар бойында цифрлық инфрақұрылым құру жұмыстары басталды. Келесі жылы 22 антенналық діңгек орнату жоспарланып отыр, — деп атап өтті Нұрымбет Сақтағанов.
