Өскеменнің экологиялық ахуалын жақсартуға бағытталған қандай жұмыстар атқарылып жатқанын ШҚО әкімі Нұрымбет Сақтағанов айтып берді, деп хабарлайды F16.kz.
Аймақ басшысының айтуынша, өңірде экологиялық жағдайды жақсартуға бағытталған кең көлемді шаралар қолға алынған. Бірінші кезекте экологиялық тәуекелдерді төмендету үшін жаңа бақылау жүйесі құрылып, ірі кәсіпорындармен бірлескен әрекет ету тетіктері енгізілді.
Қазір 25 бақылау бекетін қамтитын экологиялық мониторинг жобасы жүзеге асырылып жатыр. Болашақта бұл жүйе ірі кәсіпорындардағы өлшеу құралдарымен біріктіріліп, шығарындыларды нақты уақыт режимінде бақылауға мүмкіндік береді, – деді Нұрымбет Сақтағанов.
«ҮМЗ», «Казцинк», Өскемен ЖЭО және Согра ЖЭО сияқты ірі өндіріс орындары қолайсыз ауа райы жағдайында бірлесіп әрекет ету туралы меморандумға қол қойды. Бұл құжат кәсіпорындардың экологиялық жауапкершілігін арттырып, шығарындыларды шектеудің ортақ механизмін қалыптастырады.
Сонымен бірге қоғам мен сарапшылардың қатысуын арттыру үшін «Өскемен тынысы» атты экологиялық бюро құрылды. Оның құрамына экологтар, мемлекеттік органдар және үкіметтік емес ұйым өкілдері кірді. Жаңа платформа экологиялық саясатты жетілдіруге, ашықтықты арттыруға және тұрғындардың пікірін ескеруге бағытталған.
