Астанада өткен XXVIII халықаралық «Шабыт» шығармашыл жастар фестивалінде Өскеменнің талантты ақыны Оразай Жеңісұлы бірінші орынды жеңіп алды, деп хабарлайды F16.kz.
Халықаралық «Шабыт» фестивалі биыл да жаңа есімдерді әдебиет әлеміне жарқырата танытты. Сол жас таланттардың ішінде шоқжұлдыздай жарқырап биіктен көрінгені – өскемендік ақын Оразай Жеңісұлы.
Негізін сонау 1998 жылы Қазақстанның еңбек сіңірген қайраткері, композитор Төлеген Мұхамеджанов пен Қазақ ұлттық өнер университетінің ректоры, профессор Айман Қожабекқызы қалаған дәстүрлі байқау биыл да жоғары деңгейде ұйымдастырылды. Тәуелсіздікпен қатар жасасып келе жатқан мәртебелі өнер додасына алыс-жақын шет мемлекеттерден және еліміздің түкпір-түкпірінен «жүзден жүйрік, мыңнан тұлпар» танылған хас таланттар қатысты. Камералық музыка, фольклорлық ұжым, эстрадалық вокал, бейнелеу өнері, креативтік бағыт сияқты түрлі бағыттарды айтпағанда, поэзияның өзінде ғана жүзден аса жас ақын аламанға түсті. Олардың ішінен оза шапқан отызы екінші кезеңге өтті. Сол үміткерлер арасында өскемендік Оразай ақынның өлеңдері өзгеше үн, дара қолтаңбасымен ерекшеленіп, қазылар алқасының жоғары бағасына ие болды.
Оразай Жеңісұлы – Қазақстан Жазушылар одағының мүшесі, Bizdiң Өskemen сайтының бас редакторы. Ол биыл көктемде жастар арасында дәстүрлі түрде өтетін «Күміс қалам» республикалық әдеби байқауында да жүлдегер атанып, поэзия әлемінде өзіндік ізін айқын байқатқан.
Алтайдың тынысын жырлайтын жас ақынның бұл жеңісі – өңір өнерінің жеңісі. Оразайды шабытты шағымен құттықтап, қаламы еш шаршамасын дейміз.
