Қазақстанда жемқорлардан тәркіленген қаражат есебінен 86 мыңнан астам оқушы орны құрылды, деп хабарлайды F16.kz порталы Оқу-ағарту министрлігіне сілтеме жасап.
Мемлекет басшысының тапсырмасы бойынша құрылған Білім беру инфрақұрылымын қолдау қоры жемқорлардан тәркіленген қаражат есебінен толықтырылып келеді. Мектептерде орын жетіспеушілігі мәселесін шешу мақсатында жаңадан білім беру ұйымдарын салу немесе жаңғырту, оған жапсарлас құрылыс салу жұмыстары жүргізіліп келеді.
– Мемлекет балалар үшін жайлы әрі қауіпсіз білім беру ортасын қалыптастыруға ерекше көңіл бөледі. Бүгінде 86 мыңнан астам орындық 77 мектеп пайдалануға берілді. Олардың басым бөлігі Алматы, Түркістан, Қызылорда, Жамбыл облыстарында және Астана қаласында орналасқан, – деді Инфрақұрылымды дамыту департаментінің басқарма басшысы Жайық Мақсұтов.
Еске сала кетейік, Қор қаражаты есебінен 100 мыңға жуық орындық 89 мектептің құрылысы қаржыландырылды.
