Шығыс Қазақстан облысының әкімі Нұрымбет Сақтағанов «Алтын сапа» сыйлығының жеңімпаздарымен кездесті. Бұл мәртелебі марапат жоғары сапа стандарттарын ұстанып, бәсекеге қабілеттілігін дәлелдеген елдегі ең үздік кәсіпорындарға табысталады, деп хабарлайды F16.kz.
Бірнеше аталым бойынша өткізілген көрме-байқауға ШҚО-дан бірнеше кәсіпорын қатысып, үздіктері марапатталды. Атап айтсақ, «Өндірістік мақсаттағы үздік тауарлар» номинациясы бойынша «SP Jet» ЖШС (Өскемен)
«IZOTERM ӨСК» ЖШС (Глубокое ауданы), «ПКФ Профиль» ЖШС (Өскемен) топ жарса, «Халық тұтынатын үздік тауарлар» аталымында Өскемендегі «АЛЬЯНС-MEDICA» мен «Альприма» компанияларының өнімдері және Күршім ауданындағы «Эльмира Есманбек» ЖК өнімі үздік деп танылды. «Үздік азық-түлік өнімдері» номинациясында «Эмиль» ЖШС, «Айтас-МП» (Катонқарағай ауданы), «АС» ЖК қатарынан озды.
Шара аясында экология, әлеуметтік жауапкершілік және қайырымдылық қағидаттарын бизнесте кеңінен қолданатын кәсіпкерлерге арналған «Адал Азамат» және «Ұлы дала елі» сыйлықтарының иегерлері де марапатталды.
Олардың қатарында «Бұқтырма уылдырық өсіру шаруашылығы» ЖШС мен «IZOTERM» ӨСК бар.
«Алтын сапа» сыйлығының «Азық-түлік және/немесе ауыл шаруашылығы өнімдерін шығаратын үздік кәсіпорын» номинациясы бойынша «Эмиль» компаниясы лауреат атанса, «Өндірістік мақсаттағы үздік кәсіпорын» аталымында «Силумин-Восток» ЖШС арнайы сыйлыққа лайық деп танылды.
Сонымен қатар «Үздік индустриялық жоба» және «Үздік инновациялық жоба» арнайы сыйлықтары табысталады.
Лауреаттар диплом, премия эмблемасы мен ақшалай сыйлыққа ие болады. Жеңімпаздар жыл бойы «Алтын сапа» белгісін жарнамада және өз өнімінде қолдану құқығын алады.
Байқаудың отандық өнімнің сапасын арттыруға және қазақстандық кәсіпорындардың бәсекеге қабілеттілігін күшейтуде маңызы зор екенін айта кету керек.
