Тұрғындардың қауіпсіздігін қамтамасыз ету мақсатында шығысқазақстандық құтқарушылар 34 800-ге жуық тұрғын үйге рейдтік аралау жүргізген, деп хабарлайды F16.kz.
ШҚО ТЖД таратқан ақпаратқа сүйенсек, өңірде жылыту маусымы басталғалы 120-дан астам өрт оқиғасы тіркелген.
Оның ішінде электр жабдықтарынан 30, өрт қауіпсіздігі талаптарын сақтамау салдарынан 38, отты абайсыз қолданудан 39 өрт шыққаны анықталды. Сондай-ақ түтін мұржалары тазартылмағандықтан 7 адамға иіс тиген, — делінген департаменттің ресми ақпаратында.
«Қазгидромет» алдағы күндері өңірде термометр бағаны төмендеп, аяз болатынын мәлімдеді.
Құтқарушылар осы орайда тұрғындарды бірқатар ережелерді қатаң ұстануға шақырады:
- Пешті бензинмен, керосинмен немесе басқа да тез тұтанғыш сұйықтықтармен жағуға болмайды;
- Күлді, көмір қалдықтарын жанғыш құрылыстардан 15 метр қашықтықта арнайы белгіленген орынға шығару қажет;
- Пештің есігін ашық қалдыруға, қараусыз қоюға, пеш жағуды балаларға тапсыруға және үстіне, қасына отын, киім немесе басқа да жанғыш заттарды қоюға болмайды;
- Аязды күндері электр жылытқыштарын пайдалану кезінде өрт қаупі артады, сондықтан құрылғылардың жарамдылығын қадағалап, электр желісін шамадан тыс жүктемеу, қондырғыларды әсіресе түнгі уақытта қараусыз қалдырмау қажет.
