Шемонаиха ауданының тұрғыны өзіне дұрыс қызмет көрсетпеген медицина мекемесін сотқа беріп, өтемақы өндіріп алды, деп хабарлайды F16.kz.
Сотта жергілікті тұрғынның аудандық аурухананың үстінен жазған азаматтық талап арызы қаралды. Онда медициналық көмектің тиісті деңгейде көрсетілмеуіне байланысты материалдық шығынды өтеу және моральдық зиянның орнын толтыру талап етілген. Істі қарау барысында медициналық мекеменің бірқатар бұзушылыққа жол бергені анықталған. Атап айтқанда пациенттің жағдайы дұрыс бағаланбаған және еңбекке жарамсыздық парағы берілмеген, тексеру мен құжаттарды рәсімдеу толық жүргізілмеген, қажетті тексерулер мен емдеуге жолдама берілмеген, диспансерлік есепке қою мерзімі бұзылған. Бұл фактілерді Әлеуметтік медициналық сақтандыру қорының мониторингі растады, оның қорытындысына сәйкес аурухана қаржылық жауапкершілікке тартылған.
Сот талаптарды қанағаттандыруға негіз бар деп тапты. Төлем мөлшерін айқындау кезінде сот бұзушылықтардың сипатын, талапкердің моральдық күйзелісінің деңгейін, сондай-ақ денсаулыққа ауыр зардап болмағанын ескерді. Нәтижесінде медициналық ұйымнан материалдық шығын және моральдық зиян үшін 151 617 теңге көлемінде өтемақы, сондай-ақ 21 357 теңге сот шығындары өндірілді. Шешім заңды күшіне енді.
