ШҚО мектептерінде төрт апталық жаңа ас мәзірі қайта бекітілді. Кәсіпкерлер, ата-аналар, білім және денсаулық сақтау басқармаларының өкілдері бұл мәзірді бірнеше ай бойы талқылап, түзету енгізді, деп хабарлайды F16.kz.
Кәсіпкерлер мен ата-аналар қауымдастығының мүшелері рационның нормативтерге, қолданыстағы санитарлық талаптарға сай келу мәселесіне ерекше назар аударған.
Ортақ шешімге келу кезінде қиындықтар болды. Әсіресе, тұз, қант және сүт өнімдерінің мөлшеріне қатысты талаптардың өзгеруінен және әр маусымда рационның теңгерімді болу қажеттігіне байланысты мәселе туындады, — деп хабарлады Кәсіпкерлер палатасының баспасөз қызметі.
ШҚО денсаулық сақтау басқармасының мәліметінше, әзірленген мәзір Денсаулық сақтау министрлігінің бұйрығына және жаңа санитарлық ережелерге толық сәйкес келеді.
Мәзірде ет, балық, сүт өнімдері, көкөністер, дәнді дақылдар мен жемістердің қосылу жиілігі сақталған. Жаңа піскен жемістер мен көкөністердің ұсынылған нормасы да сәйкес келеді, — деп мәлімдеді Кәсіпкерлер палатасы.
