Кейінгі үш жылда Шығыс Қазақстан облысында 440 мыңнан астам гектар ауыл шаруашылығы жері мемлекет меншігіне өтті. Оның 89 пайызы жергілікті атқарушы органдар жұмысы нәтижесінде қайтарылған, деп хабарлайды F16.kz.
Мемлекет балансына өткізілген учаскелер біртіндеп ауыл шаруашылығы айналымына енгізіліп жатыр. 2022–2024 жылдар аралығында 96,6 мың га жер қайтадан айналымға қосылды, оның 52,8 мың гектары – халықтың қажеттілігіне, 43,8 мың гектары конкурс арқылы агроқұрылымдарға берілді.
Облыста жайылымға қатысты жаңартылған заңнамалық нормалар енгізілді. Онда заңмен ресімдемей-ақ мал жаюға рұқсат беретін қоғамдық жайылымдар ұғымы енгізілген. Жайылымдарды пайдалану 20%-дан 50%-ға дейін көтерілді. Бұл көрсеткіштен төмен жерлер тиімсіз деп танылып, мемлекетке қайтарылады. Бүгінде қала және аудан әкімдіктері жайылымды басқарудың бес жылдық жоспарларын әзірлеуді аяқтады.
Басқарманың мәліметінше, өңірде 216,9 мың гектар деградацияға ұшыраған жер анықталған. Бұл ауыл шаруашылығы алқаптарының 3,4 пайызына тең.
Келер жылға дейін мұндай жерлердің жай-күйін толық анықтау және қалпына келтіру шараларын әзірлеу жоспарланған, – деді ШҚО жер қатынастары басқармасының басшысы Надежда Михейлис өңірлік коммуникациялар қызметінде өткен баспасөз мәслихатында.
