Шығыс Қазақстан облысының әкімі Нұрымбет Сақтағанов Алтай ауданына жұмыс сапары кезінде бірнеше нысанды аралап, жергілікті спорт мектебінде болды, деп хабарлайды F16.kz.
Аймақ басшысы Лермонтов көшесіндегі көпқабатты үйдің жағдайын көрді. 1975 жылы салынған үйдегі 41 пәтерде адамдар тұрып жатыр, ал 17 пәтер қаңырап бос тұр. Облыс әкімі бұл пәтерлерді қалпына келтіру қажеттігін айтты.
Өңір басшысы 2009 жылы ашылған «Никольск-1» ЖШС жұмысымен танысты. Кәсіпорын өсімдік және мал шаруашылығымен айналысады. 20 мың гектардан артық жері бар компанияда 15 адам жұмыс істейді. Минералды тыңайтқыштарға, пестицид, тұқымға мемлекеттен субсидия алады.
Жұмыс сапары аясында Нұрымбет Сақтағанов Алтай қаласының балалар-жасөспірімдер спорт мектебіне барды. Мұнда 600-ден астам бала мен жасөспірім түрлі спорт түрімен айналысады. Оларға жағдай жасалған. Хоккей модуліне кёрлингпен айналысуға келетіндер қарасы қалың. Олардың арасында жетістікке жеткендер де аз емес. Мәселен, Ангелина Пеняева Қазақстан құрамасы сапында кёрлингтен өткен Pan Continental Curling Championship халықаралық турнирінде күміс медаль жеңіп алды. Додa биылғы 19-26 қазан аралығында АҚШ-тың Эвлет қаласында болған. Ангелина бұл спорт түрімен 2020 жылдан бері айналысып келеді.
Облыс әкімі жас спортшыларға сәттілік тілеп, дүбірлі додаларда әркез елдің, облыстың атын шығара беретіндіктеріне сенім білдірді.
Облыс әкімі сауда орындарындағы азық-түлік бағасын бақылап, әлеуметтік маңызы бар тауарлардың құны бекітілген шектен аспауы қажеттігін ескертті.
