Шығыс Қазақстан облысының Үлкен Нарын ауданында халықтың 95,7%-ы интернетпен қамтылған. Ауданда жұмыс сапарымен болған аймақ басшысы Нұрымбет Сақтағанов қалған елді мекендер сапалы интернетке қашан қосылатынын айтты, деп хабарлайды F16.kz.
Бүгінде 468 тұрғыны бар алты елді мекеннің, атап айтқанда Үштөбе, Жұлдыз, Қаражал, Алыбай, Кұндызды, Бесүй ауылдарының халқы байланыс жоқтығына немесе интернет сапасының төмендігіне жиі шағымданады.
Аталған ауылдардың мәселесін операторлармен бірлесе отырып, «Қолжетімді интернет» ұлттық жобасы аясында 2027 жылдың соңына дейін кезең-кезеңімен шешу жоспарланған. Сондай-ақ қазір интернетке қосудың балама нұсқалары қарастырылып жатыр. Облыстық цифрландыру және архивтер басқармасы Үлкен Нарын ауданының әкімімен бірлесіп, балама нұсқалары бойынша 26 желтоқсанға дейін ұсыныстар енгізуі керек, — деді аймақ басшысы.
Бүгінде аудандағы сегіз мектепте жоғары жылдамдықты интернетті қамтамасыз ету үшін «Starlink» жабдықтары орнатылған.
Сондай-ақ жолдарда байланыстың болмау мәселесін шешу мақсатында Үлкен Нарын ауданы аумағындағы республикалық тасжол бойында антенна-мачталық құрылымның құрылысын салуға сараптаманың оң қорытындысы алынды.
Айта кетейік, қазір облыс халқының 97,5%-ы интернетпен қамтамасыз етілген. Жыл соңына дейін тағы 26 ауылды желіге қосу жоспарланған. Ал қалған 66 шағын ауыл республикалық Жол картасына сәйкес 2027 жылдың соңына дейін интернетке қол жеткізеді.
