Самар ауданының Бастаушы ауылында білім ордасының тынысын кеңейтетін жаңа акт залы салынып жатыр. Жалпы аумағы 272 шаршы метр болатын зал 80 орынға лайықталған, деп хабарлайды F16.kz.
Айта кету керек, жоба толық демеуші қаражатына жүзеге асырылады. Бүгінде нысанның қабырғалары тұрғызылып, шатыры жабылды, ішкі әрлеу жұмыстары жүргізіліп жатыр. Кең, жарық әрі жайлы зал келер жылы оқушылар мен ұстаздар игілігіне беріледі.
Құрылыстың барлық шығынын Самар ауданында дүниеге келген белгілі кәсіпкер Айдын Рахымбаев көтерді.
Аудан әкімі Серік Жеңісов бұл игі істің маңызын атап өтті:
Бұл – ауыл балалары мен жастарының болашағына салынған инвестиция. Қазақстан Президенті Қасым-Жомарт Тоқаев бизнес қауымдастығының туған ауылдарды қолдау және өңірлерді дамыту ісіне қатысуының маңызын үнемі айтып келеді. Демеушілік қолдау арқылы салынып жатқан жаңа акт залы — билік, бизнес және жергілікті қауымдастық арасындағы табысты әріптестіктің айқын үлгісі, – деді ол.
Жаңа зал мектептің шығармашылық тынысын кеңейтіп, түрлі мәдени шараларды, кездесулерді, жобаларды жоғары деңгейде өткізуге мүмкіндік береді.
Айта кетейік, Айдын Рахымбаевтың білім саласына қосып жүрген үлесі мұнымен шектелмейді. Күлынжон ауылындағы заманауи Ybyrai Mektebi бүгінгі таңда табысты жұмыс істеп, озық шетелдік әдістемелер негізінде сапалы білім беріп келеді.
