Ауа райының қолайсыздығына байланысты бүгін Шығыс Қазақстан облысы аумағында бірқатар автокөлік жолы жабылды, деп хабарлайды F16.kz.
«КАЖсервис» ЖШС облыстық филиалының мәліметіне сүйенсек, 15 желтоқсан сағат 14.00-ден бастап қатты жел соғып, жаңбыр жауып, көктайғақ болуы себепті Алматы-Талдықорған-Өскемен-Шемонаиха-РФ шекарасы бағытындағы республикалық тас жолдың 1104-1191 шақырымында (Глубокое кентінен Шемонаиха қаласына дейін) барлық автокөлік түріне қозғалыс шектелді.
Сондай-ақ келесі бағыттарда жол жабылды:
Өскемен-Семей тас жолының 10-103 шақырымы (Герасимовка ауылынан Абай облысының шекарасына дейін).
Өскемен-Алтай-Үлкен Нарын-Катонқарағай-Рахман қайнары тас жолының 6-166 шақырымы (Ушанов ауылынан Алтай қаласына дейін).
Өскемен-Риддер-РФ шекарасы тас жолының 15-105 шақырымы (Белоусовка кентінен Риддер қаласына дейін).
Жолдардың жабылуына ауы райының бұзылуы әсер еткенін айта кету керек. Бүгін Шығыс Қазақстан өңірінде қарлы жаңбыр жауып, көктайғақ болып тұр, кей жерлерде боран соқты. Синоптиктердің болжамынша күннің күрт жылынуынан кейін ауа температурасы төмендеуі мүмкін. Жолдағы қозғалыс қауіпсіздігін сақтау үшін тиісті орындар көліктердің жүруіне шектеу қойды.
Болжам бойынша аталған бағыттағы жолдар 16 желтоқсан сағат 7.00-де ашылады.
