Шығыс Қазақстан облысының полицейлері мал ұрлығын ізін суытпай ашып, жоғалған бес бас ірі қараны иесіне қайтарды, деп хабарлайды F16.kz.
Полиция департаменті баспасөз қызметінің мәлімдеуінше, оқиға Тарбағатай ауданында болған. Кезекші бөлімге бес бас ірі қара малдың ұрланғаны туралы хабар келіп түскен. Әр малдың құны шамамен 300 мың теңге деп бағаланса, жалпы шығын көлемі 1,5 миллион теңге болады. Жедел іздестіру іс-шаралары барысында тәртіп сақшылары күдіктіні ізін суытпай қолға түсірді. Күдікті өз кінәсін мойындады. Ұрланған мал табылып, иесіне қайтарылды.
Аталған факті бойынша сотқа дейінгі тергеу басталды.
ШҚО полиция департаменті ауылды жерде мал ұрлығы өзекті мәселелердің бірі болып қала беретінін атап өтті. Сол себепті алдын алу жұмысы жүйелі жүргізіліп келеді. Құқық қорғау қызметкерлері тұрғындарға мал-мүлікке мұқият қарап, жоғалған жағдайда бірден 102 нөміріне хабарлау қажеттігін ескертеді.
