Келер жылы Риддерде жаңадан денешынықтыру—сауықтыру кешені салынып, бұрынғы футбол стадионы жаңғыртылады, деп хабарлайды F16.kz.
Қалалық ішкі саясат, мәдениет, тілдерді дамыту және спорт бөлімінің басшысы Қанат Оралбектің айтуынша, аталған спорт нысандары тұрғындар тығыз қоныстанған жетінші шағын ауданда шоғырланады.
2026 жылы жетінші шағын ауданда денешынықтыру кешені салынып, стадион қайта жаңғыртылады. Қазір ол жерде мыңнан астам студент білім алатын Риддер колледжі мен №16 мектеп орналасқан. Сондықтан спорт нысандарына деген сұраныс жоғары, – деді Қанат Оралбек.
Жаңартылған стадионда воркаут алаңы салынып, денешынықтыру-сауықтыру кешені жанындағы бос аумақта саябақ бой көтереді. Онда орындықтар, қоқыс жәшіктері, жарықтандыру, жаяу адамдар жолы және балаларға арналған ойын алаңы жоспарланған.
Әкімдік өкілінің айтуынша, бұл жобаны іске асыру спортпен айналысуға, демалуға және бос уақытты тиімді өткізуге қолайлы жағдай туғызып, ауданның әлеуметтік әрі спорттық инфрақұрылымын дамытуға серпін береді.
