Бәсекелестікті қорғау және дамыту агенттігі ШҚО департаменті мамандары жүргізген тексеру нәтижесінде алты субъекті әкімшілік жауапкершілікке тартылып, 10,1 млн теңге айыппұл салынды, деп хабарлайды F16.kz.
Бұл туралы биылғы жұмыс қорытындылары туралы баяндаған департамент басшысы Сәуле Бақберген өңірлік коммуникациялар қызметі алаңында өткен баспасөз мәслихатында мәлім етті.
Оның айтуынша, антимонополиялық бақылау аясында жүргізілген тексеру нәтижесінде «Өскемен әуежайы» АҚ-ның авиациялық отынға бөлшек саудада жоғары баға белгілегені анықталып, әкімшілік жауапкершілікке тартылды.
Жалпы, нарықтың алты субъектісі әкімшілік жауапкершілікке тартылып, 10,1 млн теңге айыппұл салынған, оның 10 млн теңгесі мемлекетке кіріс ретінде тәркіленді.
Сонымен қатар көмір бағасының негізсіз өсу қаупін болдырмау мақсатында екі ескерту берілген.
Мамандардың айтуынша, жұмыс үш негізгі бағытта жүргізілді: бәсекелестікті қорғау, тауар нарығының жағдайын талдау және бизнестің дамуына кедергілерді жою.
2025 жылы тауар нарығына 17 талдауы жүргізілді. Заң бұзушылықтың алдын алу үшін азық-түлік жеткізушілермен 18 антимонополиялық комплаенс-шарт жасалды. Әсіресе, кедергілерді жою және мемлекеттің экономикалық қатысуын азайту мәселесіне ерекше көңіл бөлінді. Кедергілерді жою жөніндегі кеңестің жұмысы нәтижесінде алты мәселе жергілікті деңгейде шешілді. Мемлекеттік кәсіпорындардың қызметіне 47 мониторинг жүргізіліп, жеті нұсқау берілді, — деді Сәуле Бақберген.
