Биылғы 19—20 желтоқсанда Шығыс Қазақстанда дәстүрлі «Аяз ата, ақшақар – 2025» халықаралық фестивалі өтеді, деп хабарлайды F16.kz.
Облыстық мәдениет басармасының басшысы Самат Қасенов фестиваль өткізудегі негізгі мақсат – өңірдің қысқы туризмін дамыту, мәдени бастамаларды қолдау және Жаңа жыл қарсаңында тұрғындар мен қонақтарға мерекелік көңіл-күй сыйлау деді.
Бұл фестиваль — жергілікті деңгейдегі шара емес, Шығыс Қазақстанның қысқы туристік әлеуетін халықаралық деңгейде танытатын маңызды мәдени оқиға. Биыл фестивальге Қазақстандағы Қырғызстан және Өзбекстан елшіліктерінің өкілдері, сондай-ақ Ұлытау, Жетісу және Абай облыстарынан қонақтар келеді деп жоспарланып отыр. Айтулы шараға 120-дан астам Аяз ата мен ақшақар қатысады. Бұл фестивальге деген қызығушылықтың жоғары екенін көрсетеді, — деді Самат Қасенов.
Екі күнге созылатын айтулы шара үш ірі локацияда өтеді. Атап айтсақ, 19 желтоқсан күні Риддер қаласында басталып, 20 желтоқсанда Алтай альпісі тау-шаңғы кешені мен Өскемен қаласында жалғасады. Фестиваль аясында түрлі қысқы ойын-сауық бағдарламасы ұйымдастырылады.
Осымен үшінші жыл қатарынан ұйымдастырлып отырған фестивальді облыс тұрғындары тағатсыздана күтеді. Өйткені бұл шараның өтуімен өңірде жаңажылдық мерекені жаппай тойлау басталады. Өскеменнің сол жағалау кешенінде Аяз ата резиденциясы ашылады. Ол жерде балаларға арналған хат салатын жәшіктер болады. Оның біреуін “Қазпошта” қойса, екіншісі — біздікі. Кез келген бала өзінің Аяз атаға жазған хатын осы жәшіктерге әкеліп сала алады. Ал өңірдің атымтай азаматтары, жомат жүрек қайырымды кәсіпкерлері балалардың хатын ашып оқып, олардың арманын орындауға көмектеседі, — деді ШҚО филармония диркторының орынбасары Нұрлан Серікпаев.
Оның айтуынша, биылғы жаңашылдық — резиденцияда “Қайырымдылық жәшігі” орнатылады. Оған кез келген адам сыйлық қалдыра алады. Жаңажылдық сыйлықтар жиналған соң Аяз ата мен ақшақар оны мұқтаж балаларға үлестіреді.
Сыйлықтарды біз облыстық жұмыспен қамту және әлеуметтік бағдарламаларды үйлестіру басқармасымен бірлесіп жасаған тізім бойынша таратамыз. Оның ішінде көпбалалы, әлеуметтік жағдайы төмен отбасылардың балалары да болады, — деді Нұрлан Серікпаев.
