Өскеменнің жаңа ықшам аудандарына инфрақұрым жүргізу үшін 20 млрд теңге қаражат қажет. Бұл туралы қала әкімі Алмат Ақышов айтты, деп хабарлайды F16.kz.
Оның айтуынша, бұл аудандарға жарық, су, кәріз жүйесін тартып, жол салу бірінші кезекте ол жерде тұрып жатқан адамдардың қауіпсіздігі үшін маңызды. Айталық, 28-ші ықшам ауданда бірнеше жылдан бері электр қуаты тұрақты берілмей, халықты әуре-сарсаңға салып келеді. Жуықта жергілікті үйлердің бірінде пеш жарылып, қираған қабырға кішкентай қызды басып қала жаздаған.
Жағдай қиын екенін білеміз, кез келген сәтте оқыс оқиға болуы мүмкін. Сол себепті біз биыл 60 млн теңгеге қосалқы электр желісін тарттық, – деді әкім.
Бұл шағын аудандарда жолдың сапасы да талапқа сай емес. Жаңбыр жауған кезде, көктем мен күз айларында балалар мектепке батпақ кешіп барып жүр. Жол жаман болған соң мұнда такси де, автобус та жүрмейді.
Шаһар басшысы биыл бюджет қаражатының мүмкіндігіне қарай жалпы ұзындығы 17,1 км болатын 28 учаскеге асфальт төселгенін атап өтті.
Мұндай мәселелер қалада көп, олардың әрқайсы жүйелі түрде шешуды қажет етеді. Инженерлік желіден бастап көлік қатынасына дейінгі түйткілдерді ретке келтіреміз, – деді ол.
