Қазақстанда әскерге шақыру және мерзімді әскери қызмет жүйесіне цифрлық шешімдер белсенді енгізіле бастады. Мемлекет басшысының тапсырмасына сәйкес Қорғаныс министрлігі жаңа технологияларды медициналық тексеру, азаматтарды ақпараттандыру, шақыру тізімдерін қалыптастыру және қызметті ұйымдастыру бағыттарында қолданады, деп хабарлайды F16.kz.
Шақыру науқанын цифрландыру аясында «e-Медосмотр» ақпараттық жүйесі іске қосылды. Жүйе Денсаулық сақтау министрлігінің базасымен біріктіріліп, әскерге шақырылғандардың медициналық деректерін нақты уақытта алуға мүмкіндік береді. Ол 100-ден астам медициналық көрсеткішті қамтитын цифрлық медициналық картаны қалыптастырады, дәрігер қорытындыларын ЭЦҚ және QR-код арқылы бекітеді. Қазір жүйе Астана, Шымкент қалаларында, Жетісу, Батыс Қазақстан облыстарында енгізілген.
Азаматтарды ақпараттандыру үшін ARMIA.KZ цифрлық сервисі іске қосылды. Жасанды интеллектіге негізделген бұл платформа әскери қызметке қатысты сұрақтарға жедел жауап беріп, Қорғаныс министрлігінің цифрлық жүйелерімен біріктіріледі.
Сонымен қатар, «Smart военкомат» жүйесі енгізілді. Ол жасанды интеллект көмегімен шақырылуға жататын азаматтардың тізімін автоматты түрде жасап, медициналық тексеруден өту туралы хабарламалар жолдайды. Жүйе жасы, денсаулық жағдайы, білімі және кейінге қалдыру немесе босатылу негіздерін ескереді.
Цифрлық тәсілдер әскери қызмет барысында да қолданылады. Sarbaz+ пилоттық жобасы аясында әскери қызметшілердің денсаулығы фитнес-браслеттер арқылы бақыланып, IT, телекоммуникация және дрон басқару бағыттары бойынша қосымша дағдылар алу мүмкіндігі қарастырылған.
Жалпы, цифрлық шешімдер әскерге шақыру рәсімдерін ашық әрі тиімді етуге, даярлық сапасын арттыруға және әскери қызмет жағдайын жақсартуға бағытталған.
