Мемлекет басшысының тапсырмасына сәйкес, Риддер қаласында ірге көтерген көпсалалы аурухана кешенінің құрылысы аяқталды. Бүгін әлеуметтік нысанды Шығыс Қазақстан облысының әкімі Нұрымбет Сақтағанов пен денсаулық сақтау министрі Ақмарал Әлназарова аралап көрді, деп хабарлайды F16.kz.
Жаңа медициналық кешен құрамына 200 төсек-орынға арналған стационар және бір ауысымда 500 адамды қабылдай алатын емхана кіреді. Жобаның жалпы құны – 34,8 млрд теңге. Бас мердігер – «Элхон» ЖШС. Нысан пайдалануға қабылданды.
Аймақ басшысы атап өткендей, аурухананың негізгі корпустары, оның ішінде педиатрия бөлімшесі 80 жыл бұрын салынған, ескі. Сол себепті оның орнына жаңа ғимарат салу қажеттілігі туындаған. Енді жаңадан салынған кешен заманауи талаптарға сай көпсалалы медициналық мекеме ретінде қызмет көрсетеді. Мұнда Риддер қаласының тұрғындары ғана емес, жақын маңдағы елді мекендердің халқы да медициналық көмек ала алады.
Аурухана кешенінің құрылысы «Заңсыз иемделген активтерді мемлекетке қайтару туралы» заңы аясында бөлінген қаражат есебінен жүргізілді.
Жалпы ауданы 40 мың шаршы метрден асатын үшқабатты ғимарат қажетті медициналық құрал-жабдықтармен толық қамтамасыз етілген. Кешен құрылымында тәулік бойы жұмыс істейтін стационар, күндізгі бөлім, паллиативті көмек, консультативтік-диагностикалық және алғашқы медициналық-санитариялық көмек көрсету қызметтері қарастырылған.
Қазір тиісті құжаттарды рәсімдеу жұмыстары аяқталуға жақын. Рәсімдер толық біткен соң көпсалалы аурухана кешені тұрғындарды қабылдай бастайды.
