ШҚО әкімі шетелдік инвесторлармен кездесу өткізді. Кәсіпкерлер өңірде ауқымды инвестициялық жобаларды жүзеге асыруға қызығушылық білдіріп отыр, деп хабарлайды F16.kz.
Облыс орталығында феррокремний өндіретін зауыт бой көтеруі мүмкін. Шамамен 600 ажамды жұмыспен қамтитын кәсіпорынды Бахрейн Корольдігінде тіркелген халықаралық компания салуға ниетті. Инвестиция көлемі 500 миллион АҚШ долларына дейін жетуі мүмкін. Жоба аясында жергілікті шикізат пайдаланылмақ.
Инвесторлардың айтуынша, өндірісте заманауи экологиялық технологияларды қолдануға ерекше мән береді.
Кездесу барысында HONGKONG BBGO INVESTMENT HOLDING компаниясының өкілдері де Өскемендегі қалдық сақтау қоймаларын экологиялық рекультивациялау жобасын таныстырды. Ұсынылып отырған технология мыс, алтын, күміс және басқа да бағалы металдарды 80 пайыздан астам тиімділікпен алуға мүмкіндік береді. Сондай-ақ мүлде қалдық қалдырмау қағидаты, тұйық су айналымы және өндіріс қалдықтарын қауіпсіз құрылыс материалдарына қайта өңдеу қарастырылған, — дейді облыс әкімінің баспасөз қызметі.
Айта кетейік, аталған компания Қытай, Малайзия және Лаос елдерінде 15 жылдан астам уақыт бойы экологиялық және ресурсты үнемдейтін жобаларды табысты жүзеге асырып келеді.
Қазіргі уақытта жобалар пысықтау кезеңінде.
