«Ауыл құтқарушылары» ведомстволық бағдарламасы аясында Шығыс Қазақстан облысы Глубокое ауданы, Тарханка ауылында өрт сөндіру бекеті құрылды, деп хабарлайды F16.kz.
Аталған бекет Тарханка, Винное және Веселое елді мекендерінде тұратын 3000-нан астам тұрғынның қауіпсіздігін қамтамасыз етеді. Жобаны Төтенше жағдайлар министрлігі қолға алды, ал серіктес ретінде «Милейко» ЖШС қолдау көрсетті.
Осындай игілікті іс Шемонаиха ауданында да жалғасын тапты. Мұнда бірден екі өрт сөндіру бекеті — Красная Шемонаиха және Сугатовка ауылдарында ашылды. Бағдарламаны іске асыруда «Белокаменское» ЖШС мен «Заря» шаруа қожалығы серіктес болды. Енді ол бекеттер Красная Шемонаиха, Белый Камень, Сугатовка, Горкуново және Кенюхово ауылдарында тұратын 1500-ден астам адам5f қызмет көрсетеді.
Ашылған барлық бекетnth тәулік бойы қызмет атқаруға арналған қажетті үй-жайлармен жабдықталған. Материалдық-техникалық жарақтандыру құрамына өрт сөндіру және құтқару құрал-жабдықтары, байланыс құралдары және жеке құрамға арналған арнайы киімдер кіреді.
Ашылу салтанатына Шығыс Қазақстан облысы ТЖД бастығы Рашид Блялов, құтқарушылар, жергілікті тұрғындар және аудан әкімдері қатысты.
Осындай маңызды нысандарды облыстың өзге де елді мекендерінде дамыту жоспарда бар.
