Табиғаты көркем Шығыс Қазақстан облысында еліміздегі бүкіл орман алқабының шамамен 40 пайызы шоғырланған. Аймақта орман шаруашылығы мекемелерінің материалдық-техникалық базасын нығайту жұмыстары жалғасып жатыр. Бүгін шығысқазақстандық орманшыларға 138 жаңа техника табысталды, деп хабарлайды F16.kz.
Қазір облыс аумағында 13 орман шаруашылығы, екі мемлекеттік қорық және бір ұлттық парк тұрақты жұмыс істеп тұр.
Орман шаруашылықтарының материалдық-техникалық базасын нығайту бойынша жүйелі жұмыс жүргізіліп келеді. Соңғы 7 жылда бюджет қаражаты есебінен жалпы құны 2,2 млрд теңгеге 107 техника сатып алынды. Қабылданған шаралар сала мамандарының еңбек жағдайын жақсартуға, орман қорын қорғау тиімділігін арттыруға, орман өртінің алдын алуға және жедел әрекет етуге мүмкіндік береді, — деді аймақ басшысы.
«Верх-Уба» орман шаруашылығының директоры Тұрсынхан Айтымбетовтің айтуынша, бұған дейін техника жетіспеушілігі байқалып, жұмыс қарқынына айтарлықтай әсер еткен. Десе де кейінгі жылдары орман шаруашылығын дамытуға, қалпына келтіруге айтарлықтай көңіл бөлініп, жаңа техникадан бөлек құрал-жабдықтар да жаңартылып жатыр.
Біздегі орман қоры 109 мың шаршы метр аумақты қамтимды. Қазір шаруашылықта 15 техника бар. Өрт сөндіру кезінде, орманды қалпына келтіруде әр техниканың өз орны бар. Бүгін техникалық парк үш трактор, үш шағын өрт сөндіру кешені және бір УАЗ автокөлігімен толықты, — деді ол.
Бүгін Мемлекет басшысының тапсырмасы аясында Өнеркәсіпті дамыту қоры арқылы шамамен 3,9 млрд теңгеге 122 техника және облыстық бюджет есебінен 240 млн теңгеге 16 жол талғамайтын техника табысталды.
Бұл жұмыстар тоқтап қалмайды. Көктемде тағы да өрт сөндіру көліктерін алдыруды жоспарлап отырмыз, — деді ШҚО табиғи ресурстар және табиғат пайдалануды реттеу басқармасы басшысының орынбасары Мерхат Әміров.
