Шығыс Қазақстан облысында «Шығыс шақырады» деген жаңа тұрғын үй бағдарламасы іске қосылмақ. Жобаны жергілікті атқарушы орган мен «Отбасы банк» бірлесе жүзеге асырады, деп хабарлайды F16.kz.
Аталған бастама еліміздің өзге өңірлерінен Шығыс Қазақстанға көшіп келіп, тұрақты еңбек етуді жоспарлаған азаматтарға арналған. Бағдарлама аясында өтінім қабылдау және қатысушыларды іріктеу жұмыстары 2026 жылы басталады. Іріктеуге облыс әкімдігі жауапты болса, баспанаға берілетін жеңілдетілген несиені «Отбасы банк» ұсынады.
Ипотекалық несиенің негізгі шарттары:
- жылдық сыйақы мөлшерлемесі – 5% (жылдық тиімді сыйақы мөлшерлемесі 5,2–5,7%);
- бастапқы жарна – тұрғын үй құнының 10 пайызы;
- қарыздың ең жоғары көлемі – 20 миллион теңге.
Бағдарлама арқылы сатып алуға болатын тұрғын үйлер:
- алғашқы немесе қайталама нарықтағы пәтерлер;
- Қазақстан тұрғын үй компаниясының кепілдігімен салынып жатқан үйлер;
- жеке тұрғын үйлер.
Сатып алынатын баспана міндетті түрде Шығыс Қазақстан облысының аумағында орналасуы керек.
Қатысушыларға қойылатын талаптар:
- Өтініш беруші мен оның отбасы мүшелерінің соңғы бес жыл ішінде ШҚО аумағында меншігінде немесе жалға алған тұрғын үйі болмауы тиіс (апатты жағдайдағы жалғыз баспана есепке алынбайды);
- Ресми табыстың болуы:
жалдамалы қызметкерлер үшін – кемінде 6 ай;
жеке кәсіпкерлер үшін – кемінде 12 ай.
Сонымен қатар, жастарды қолдауға бағытталған «Серпін» бағдарламасының түлектері де бұл жобаға қатыса алады. Аталған жоба Түркістан, Қызылорда, Жамбыл, Алматы, Жетісу және Маңғыстау облыстарының жастарын қамтиды.
Облыс әкімдігінің хабарлауынша, «Шығыс шақырады» бағдарламасының басты мақсаты – өңірдің еңбек нарығын жаңа мамандармен толықтыру және ел ішіндегі көші-қон теңгерімін жақсарту.
