Қазақстанның Халық әртісі, Мемлекеттік сыйлықтың иегері, қазақ эстрадасының аңызы Роза Рымбаева жарты ғасырға жалғасқан шығармашылық жолын 7 ақпанда Алматы төрінде өтетін мерейтойлық концертпен түйіндемек. Осыдан кейін теңдессіз талант иесі сахнамен қоштасуы мүмкін, деп хабарлайды F16.kz.
Өнерде жүргеніне 50 жыл толуына орай ұйымдастырылатын бұл концерт Республика сарайында 7 ақпанда кешкі сағат 19.00-де басталады. Шығармашылық кеште Роза Рымбаеваның көпшілік сүйіп тыңдайтын танымал әндері шырқалады. Сонымен қатар жаңа туындылардың тұсауы кесіледі. Концертте «Al jazz Symphony» эстрадалық-симфониялық оркестрі және басқа да отандық музыканттар өнер көрсетеді. Ең бастысы, бұл күні әндердің барлығы жанды дауыста, ешқандай фонограммасыз айтылады.
Естеріңізге сала кетсек, кеш иесі осыған дейін БАҚ өкілдерімен болған бір сұхбатта бұл оның сахнадағы соңғы концерті болуы мүмкін екенін айтқан.
Бұл – менің өнер жолымның ең маңызды кезеңдерінің бірі. Осы концерттен соң сахнамен қоштасуым мүмкін, – деген еді Роза Рымбаева.
Елу жыл бойы қазақ өнерінің көшін алға сүйреген әншінің мерейтойлық кешіне билеттер Fredoom Ticketon сайтында сатылып жатыр.
