Өскеменде «Халық бухгалтері» республикалық акциясы аясында салық төлеушілерге ашық есік күні өтті, деп хабарлайды F16.kz.
Ондағы мақсат – жеке кәсіпкерлер мен шағын бизнес субъектілеріне тегін консультациялық көмек көрсету.
Ашық есік күні мамандар жаңа Салық кодексінің нормаларын, салықтық есептілікті тапсыру тәртібін, жаңа арнайы салық режимдеріне көшуге қатысты өтпелі ережелерді, қосылған құн салығы бойынша есепке қою және есептен шығару тәртібін, сондай-ақ мемлекеттік кірістер органдарының ақпараттық жүйелерінде жұмыс істеу мәселелерін түсіндірді. Жиі қойылатын сұрақтарға жауап берілді.
Кеңес беру барысында такси қызметіне қатысты сұрақтарға ерекше назар аударылды. Аталған санаттағы салық төлеушілерді өзін-өзі жұмыспен қамтығандар режиміне көшу тәртібі, тіркелу ерекшеліктері, салық салу және салықтық міндеттемелерді орындау мәселелері қызықтырды.
«Халық бухгалтері» акциясы аясында өткізілген ашық есік күні мемлекеттік кірістер органдарының жұмысында сервистік тәсілді дамытуға, салықтық сауаттылықты арттыруға және салық заңнамасын бұзушылықтардың алдын алуға бағытталған маңызды қадам болды.
Акция биылғы 30 маусымға дейін жалғасады. Салық төлеушілерге арналған кеңестер бекітілген кестеге сәйкес тұрақты негізде жүргізіледі.
