Белгілі қазақстандық актер Мұрат Бисембин 54 жасқа қараған шағында ұзаққа созылған ауыр дерттен көз жұмды. Бұл қаралы хабарды оның қызы әлеуметтік желі арқылы жеткізді, деп хабарлайды F16.kz.
Былтыр желтоқсанның соңында актер инсульт алып, шұғыл түрде ауруханаға жатқызылған. Кейін отбасы мүшелері оның денсаулығы бірде нашарлап, бірде тәуір болып қалатынын мәлім еткен.
Бұған дейін әріптестері Мұрат Бисембиннің бір жылдан астам уақыт бойы онкологиялық дертпен күресіп, ем-дом қабылдап жүргенін айтқан. Соған байланысты актер бірқатар жобадан бас тартып, түсірілімдерді тоқтатуға мәжбүр болды.
Мұрат Бисембин 1972 жылы 11 қазанда Қызылорда қаласында дүниеге келген. Политехникалық институтты ауыл шаруашылығының инженер-механигі мамандығы бойынша тәмамдаған.
Актерді танымал еткен рөлі – 2007 жылы түсірілген «Рэкетир» фильміндегі Руслан бейнесі. Осы рөлден кейін ол көрерменге кеңінен танылған.
F16.kz редакциясы марқұмның отбасына, туған-туыстары мен жақындарына ауыр қайғыға ортақтасып көңіл айтады.
