Былтырғы желтоқсан айында елімізде тұрғын үй бағасы өсті. Бұл әсіресе екінші нарықта және жалға беру сегментінде айқын байқалды, деп хабарлайды F16.kz.
Ұлттық статистика бюросының мәліметінше, 2025 жылғы желтоқсанда жаңа тұрғын үйлер орта есеппен 0,4 пайызға қымбаттаған. Ал қолданыстағы баспаналардың бағасы 1,2 пайызға, жалға берілетін пәтерлер 2,1 пайызға көтерілген.
Жаңадан салынған тұрғын үйлер нарығында ең жоғары өсім Өскеменде тіркелді – 10%. Одан кейінгі орындарда Түркістан (+6,6%) және Қонаев (+4,5%) қалалары тұр.
Сондай-ақ тұрғын үй бағасы Павлодарда 2,9 пайыз, Шымкентте 1,9 пайыз артқан. Ал Алматы мен Астанада өзгеріс аса байқалмайды.
Сарапшылар жалға алу нарығындағы өсімді тұрғын үйге деген сұраныстың жоғары, ал дайын пәтерлер санының шектеулі болуымен байланыстырады.
