2025 жылғы сәуір мен желтоқсан аралығында ірі қалалардағы жалдамалы тұрғын үй бағасы өскен. Статистикаға сәйкес, республика бойынша 1 шаршы метрдің орташа құны 4558 теңгеден 5024 теңгеге дейін қымбатттады, деп хабарлайды F16.kz.
Ұлттық статистика бюросы ұсынған мәліметке сүйенсек, 2024 жылғы желтоқсаннан бері республика бойынша жалға алу ақысы 13,1 пайызға қымбаттаған. Алайда жекелеген өңірлерде өсім орташа республикалық деңгейден едәуір жоғары тіркелген.
Павлодарда жалдамалы тұрғын үй бағасы бір жылда 42,9 пайызға, Петропавлда 40,9 пайызға артқан. Ақтөбеде өсім 30,4 пайызды құраса, Өскеменде жалға алу ақысы 23,1 пайызға қымбаттаған, — делінген Ұлттық статистика бюросының мәліметінде.
Қазіргі таңда ел бойынша ең жоғары жалға алу бағасы Алматы мен Астанада сақталып отыр. Ал облыс орталықтарының ішінде ең төмен көрсеткіш Тараз қаласында тіркелген. Мұнда 1 шаршы метрдің орташа құны 2401 теңгені құрайды.
