Өңірде инженерлік инфрақұрылымды кезең-кезеңімен жаңарту жұмысы кешенді жүргізіліп жатыр. Бірінші кезекте коммуналдық желілердің ең тозған әрі апатты учаскелері назарға алынған. Бұл туралы Үкімет отырысында Шығыс Қазақстан облысының әкімі Нұрымбет Сақтағанов мәлім етті, деп хабарлайды F16.kz.
Өткен жылдың қорытындысы бойынша су құбыры желілерінің тозу деңгейі 47%-ға, кәріз желілері бойынша 69%-ға дейін төмендетілді. Жалпы алғанда сумен жабдықтау және суды бұру желілерінің 358 шақырымнан астамы қайта жаңартылып, салынды. 2026 жылы 309 шақырым сумен жабдықтау және суды бұру желілерін қайта жаңғырту жоспарланып отыр, — деді аймақ басшысы.
Бұл су құбыры желілерінің тозуын 45%-ға, ал су бұру желілері бойынша 67%-ға дейін төмендетуге мүмкіндік береді.
Сондай-ақ аймақ басшысы Президенттің халықты сапалы ауызсумен толық қамту жөніндегі тапсырмасы жүзеге асырылғанын баяндады. Атап айтқанда, 2021 жылдан бері өңірде 60 жоба аяқталып, 112 шағын елді мекенде кешенді блок-модульді қондырғылар орнатылған. 1 мың шақырымнан астам су құбыры желілері салынды және қайта жаңғыртылды.
