Шығыс Қазақстан облысында жедел медициналық жәрдем қызметінің материалдық-техникалық базасы жаңартылды. Өңір автопаркіне 36 жаңа үлгідегі арнайы медициналық көлік жеткізіліп, олар алдағы уақытта қала мен аудан бөлімшелерінде қызметке кіріседі, деп хабарлайды F16.kz.
Жаңа техникалардың қатарында 4 С санатындағы реанимобиль, 26 В класты және 6 Б класты жедел жәрдем көлігі бар. Барлық автокөлік заманауи медициналық құралдармен жабдықталған және тәулік бойы үздіксіз жұмыс істеуге бейімделген. Бұл көліктер шұғыл шақыртуларға жедел жетіп қана қоймай, ауыр жағдайдағы науқастарды қауіп-қатерсіз медициналық мекемелерге жеткізуге мүмкіндік береді.
Автопарктің жаңаруы жедел жәрдем бригадаларының жолға кететін уақытын қысқартып, қызмет сапасын арттыруға ықпал етеді. Сонымен қатар шалғай елді мекендерде еңбек ететін медицина қызметкерлері үшін қолайлы әрі қауіпсіз жұмыс жағдайы қалыптасады. Айта кету керек, өңірлік жедел медициналық жәрдем қызметі соңғы рет 2020 жылы осындай ауқымды жаңартылған.
Жаңа көліктердің кілті салтанатты шара барысында аудандық жедел жәрдем бөлімшелерінің жүргізушілеріне табысталды. Шараға қатысқан облыс әкімі Нұрымбет Сақтағанов жедел жәрдем қызметінің маңызын атап өтіп, бұл жаңартудың тұрғындар денсаулығын қорғаудағы рөлі зор екенін жеткізді.
Күн сайын жедел жәрдем бригадалары жүздеген шақыртуға шығады, ал диспетчерлер мыңға жуық қоңырауды қабылдайды. Әрбір қоңыраудың артында адам өмірі тұр. Жаңа автокөліктер медицина мамандарына науқасқа уақтылы жетуге, қауіпсіз жағдайда жұмыс істеуге және ең бастысы — адам өмірін сақтауға мүмкіндік береді, — деді өңір басшысы.
Жаңартылған жедел жәрдем көліктері Алтай, Глубокое, Зайсан, Үлкен Нарын, Катонқарағай, Күршім, Марқакөл, Самар, Тарбағатай, Шемонаиха аудандарына және Риддер қаласына бөлінді.
