Былтырдан бері Шығыс Қазақстан облысы полиция департаментінің көші-қон қызметі басқармасы басқа мемлекеттің азаматтығын алуына байланысты Қазақстан Республикасының азаматтығын жоғалтқан 1000-нан астам адамды анықтады, деп хабарлайды F16.kz.
Қос азаматтық алғаны үшін 63 адам әкімшілік жауапкершілікке тартылды. Олардың 38-і шетел азаматтығын алғаны туралы белгіленген мерзімде хабарламағаны үшін, ал 15-і Қазақстан Республикасының төлқұжаты мен жеке куәлігін заңсыз пайдаланғаны үшін жазаланды.
Анықталған фактілердің бірі облыс орталығының 47 жастағы тұрғынына қатысты. Ол қызымен бірге шетел азаматтығын алып, уәкілетті органдарды уақытында хабардар етпеген. Сот шешімімен заң бұзушы Қазақстан Республикасының аумағынан шығарылды.
2026 жылдың басынан бері сот шешімімен 11 адам елден шығарылып, олардың барлығынан Қазақстан Республикасының азаматтық құжаты қайтарып алынды.
ШҚО полиция департаментінің көші-қон қызметі ел аумағында қос азаматтыққа тыйым салынатынын еске салады және шетел азаматтығын алған жағдайда 30 күн ішінде ішкі істер органдарына хабарлау және ҚР құжаттарын тапсыру қажет екенін ескертеді.
