Глубокое ауданының Секисовка ауылында бір ауысымда 25 адам қабылдайтын дәрігерлік амбулатория жұмыс істеп тұр. Нысан 2024 жылы қолданысқа берілген. Шығыс Қазақстан облысының әкімі Нұрымбет Сақтағанов жұмыс сапары аясында алғашқы медициналық—санитариялық көмек көрсету мекемесінде болып, жұмысымен танысты, деп хабарлайды F16.kz.
Ауылдық жерде медицинаны дамыту – мемлекет саясатының басым бағыттарының бірі. Мемлекет басшысының тапсырмасына сәйкес, елімізде денсаулық сақтау жүйесін жаңғырту, медициналық көмектің қолжетімділігі мен сапасын арттыру бағытында жүйелі жұмыстар жүргізіліп жатыр. Бұл бастамалар ауыл халқының денсаулығын нығайтуға, дерттің алдын алуға және халықтың өмір сүру сапасын жақсартуға бағытталған.
Аудандық аурухананың бас дәрігері Мирхат Увазыровтың айтуынша, дәрігерлік амбулатория науқастарға алғашқы медициналық көмек көрсетуге қажетті барлық құрал-жабдықтармен қамтылған.
Мұнда скринингтен өту, алдын алу мақсатындағы флюрографиялық тексеру, науқасты қарау кабинеті жұмыс істейді. Барлығы үш медицина маманы еңбек етеді, олардың біреуі – дәрігер, екеуі орта медицина қызметкері. Қосымша тағы бір дәрігер, акушер және медбике жетіспейді, – деді бас дәрігер.
Сонымен қатар ол кейбір мамандар қажеттілікке қарай аудан орталығынан келіп қызмет көрсететінін айтты. Себебі ауылда бірнеше штат ұстап отыру тиімсіз.
Амбулаторияда видеокольпоскоп аппараты бар. Онымен жұмыс істейтін гинеколог аудан орталығынан келеді. Өйткені бұл жерден арнайы штат ашып, дәрігер ұстап отыра алмаймыз. Сондай-ақ емдік денешынықтыру кабинеті де әзірге бос тұр, себебі реабилитолог жоқ. Бұл мекеме лицензиясын енді ғана алып, жұмыс істей бастады. Аталған мәселелер уақытымен шешімін табады, – деп қосты Мирхат Увазыров.
Оңалту қызметін алып жүрген жергілікті тұрғын Александр Мартыневский денсаулығы күннен күнге жақсарып келе жатқанын айтты.
Инусльт алып, облыс орталығындағы ауруханада жеті күн жаттым. Шыққан соң ары қарай оңалту курсынан өту қажет болды. Ондай қызмет өзіміздің ауылда да бар екен. Жақсы болды, аудандық ауруханаға сабылмай ауылда емделіп жатырмын. Бастапқыда оң қолым қозғалмай қалған. Осында келіп жүргеніме бір апта болды. Қазір тәуірмін, қолым қимылдауға келді, – деді ауыл тұрғыны.
Әлеуметтік мекемені аралап, ем алып жатқан тұрғындармен сөйлескен өңір басшысы «Ауылдық денсаулық сақтауды жаңғырту» ұлттық жобасы аясында іске қосылған амбулаторияның ауыл халқы үшін маңызы зор екенін атап өтті.
