Өскеменде әйелдер командасы арасында волейболдан Қазақстан Суперкубогы өз мәресіне жетті. Финалда «Жетісу» командасы «Тұран» ойыншыларын 3:0 есебімен тас-талқан етіп жеңіп, ел Суперкубогының бес дүркін иегері атанды, деп хабарлайды F16.kz.
Ойыннан кейін жетісулық ұжымның бас бапкері Марко Гршич шәкірттерінің жеңісі туралы айтты.
Командамды және барша жанкүйерлерді шын жүректен құттықтаймын. Қиындықтарға қарамастан, Суперкубокты тағы да Жетісу жеріне алып барамыз. Бұл – біздің жанкүйерлер үшін зор қуаныш. Сонымен қатар бұл жеңісті Азия чемпиондар лигасына қатысу жолындағы маңызды қадам деп есептеймін, – деді ол.
Айта кетейік, финалдық ойында «Жетісу» сапында Мария Фролова 21 ұпаймен ең нәтижелі ойыншы атанса, Ирина Кенжебаева 12, Наталья Борисенко 8 ұпай жинап, команданың жеңісіне елеулі үлес қосты.
«Жетісу» волейбол клубы Қазақстан чемпионатының және ел кубогының 9 дүркін жеңімпазы, сондай-ақ Азия чемпиондар лигасының жеңімпазы атанған.
