Аймақ басшысы Нұрымбет Сақтағанов Риддерге жұмыс сапары кезінде SHNET ЖШС—ға қарасты жылу қазандығының жұмысын тексерді. Бұл нысан Тишин кенішін және 2-ші, 4-ші ықшам аудандарды жылумен қамтамасыз етеді, деп хабарлайды F16.kz.
Серіктестік директоры Алексей Алыбаевтың айтуынша, кәсіпорынға былтыр жазда күрделі жөндеу жүргізіліп, ескі қондырғылар түгел жаңартылған. Тозған жылу желілері ауыстырылды.
Былтыр жазда №3-ші және №6-шы қазандық агрегаттарына күрелі жөндеу жүргізілді. Мұның сыртында көмірді ұнтақтау, жеткізу қондырғылары ағымдағы жөндеуден өткізілді. Ғимараттың шатырын жаңарттық, өйткені төбеден су тамшылап тұратын. Жұмыстар жоспарға сай атқарылып жатыр. Енді қаржылық мүмкіндікке қарай жұмысшылардың еңбекақысын көтеріп берсе, басқа ешқандай мәселе жоқ, – деді Алексей Алыбаев.
Оның айтуынша қазір жылу орталығында бес қазандық жұмыс істеп тұр және олардың жылу қуаты тұтынушыларға жеткілікті, тіпті артылып қалады.
Кәсіпорынды аралап, жұмыс барысын көзбен көрген облыс әкімі тұрғындар жылумен үздіксіз қамтамасыз етілуі керек деді.
Қазандық агрегаттарын, инженерлік желілердің жағдайын ұдайы назарда ұстаңыздар. Ең бастысы жылу үздіксіз берілуге тиіс. Тұрғын үйлер жылы болса, ешқандай проблема туындамаса, онда менің де сіздерге сұрағым жоқ. – деді өңір басшысы.
