Былтыр Шығыс Қазақстан облысында Мемлекеттік әлеуметтік сақтандыру қорынан (МӘСҚ) 29,5 млрд теңгеден астам әлеуметтік төлем жүзеге асырылды. Бұл туралы Шығыс Қазақстан облысы бойынша «Мемлекеттік әлеуметтік сақтандыру қоры» АҚ филиалы мәлім етті.
Қор 2005 жылдан бері міндетті әлеуметтік сақтандыру жүйесі арқылы жұмыс істейтін азаматтарды әлеуметтік қатерлер кезінде қосымша қолдаумен қамтамасыз етіп келеді. Жүйе жұмыс берушілердің, жеке кәсіпкерлердің және өзін-өзі жұмыспен қамтыған азаматтардың әлеуметтік аударымдары есебінен қалыптасады. 2025 жылдан бастап әлеуметтік аударым мөлшерлемесі 5% болды.
НЕГІЗГІ ТӨЛЕМДЕР
2025 жылы облыста:
-
3340 адам еңбекке қабілеттілігінен айырылуына байланысты 1,6 млрд теңге,
-
3223 отбасы асыраушысынан айырылуына байланысты 1,6 млрд теңге алды.
Ана мен балаға байланысты төлемдер де маңызды қолдау болып отыр:
-
5429 әйелге жүктілік және босану бойынша 9,4 млрд теңге,
-
15 915 адамға бала күтімі үшін 10,9 млрд теңге төленді.
Сондай-ақ, жұмысынан айырылу жағдайына байланысты 14 207 адам жалпы сомасы 6 млрд теңге көлемінде әлеуметтік төлем алды. Осылайша, 2025 жылы МӘСҚ-тан Шығыс-Қазақстан облысы бойынша 29,5 млрд теңге төленді.
ЦИФРЛАНДЫРУ ЖӘНЕ АВТОМАТТАНДЫРУ
Әлеуметтік төлемдердің басым бөлігі электронды форматта көрсетіледі. 2025 жылдың қорытындысы бойынша МӘСҚ қызметтерінің 70%-дан астамы онлайн түрде ұсынылды. Өтініштерді egov.kz порталы, екінші деңгейлі банктердің мобильдік қосымшалары және «Азаматтарға арналған үкімет» арқылы беруге болады.
2025 жылғы 15 қазаннан бастап әлеуметтік төлемдерді автоматты түрде тағайындау жөніндегі пилоттық жоба іске қосылды. Жоба шешім қабылдау мерзімін бір жұмыс күніне дейін қысқартуға мүмкіндік береді. Барлық деректер мемлекеттік ақпараттық жүйелер арқылы тексеріледі, ал шешім нәтижесі өтініш берушіге SMS арқылы хабарланады.
МӘСҚ-тың басты мақсаты – әлеуметтік тәуекелдер туындаған жағдайда азаматтарға әділ әрі уақтылы төлем тағайындау, халықты ресми жұмыспен қамтуға ынталандыру және мемлекеттік қызметтердің қолжетімділігін арттыру.
