Бүгін, 21 қаңтарда облыстың барлық білім беру ұйымдарында құқық қорғау органдары өкілдерінің қатысуымен «Заң және тәртіп» тұжырымдамасы аясында бірыңғай сынып сағаты ұйымдастырылды, деп хабарлайды F16.kz.
Білім басқармасының мәліметінше, бастаманың негізгі мақсаты – оқушылардың құқықтық мәдениетін қалыптастыру, заң талаптарын түсіндіру, жеке жауапкершілік пен қоғамдық тәртіптің маңызын ұғындыру.
Сынып сағаттары барысында түрлі форматтағы іс-шаралар өткізілді. Атап айтқанда, құқық тақырыбындағы викториналар, жағдаяттық тапсырмалар, квест ойындары, дәрістер мен рөлдік қойылымдар ұйымдастырылды. Бұл жұмыстар балалар мен жасөспірімдердің құқықтық сауаттылығын арттыруға және заңға деген құрметін нығайтуға бағытталды.
9-сынып оқушыларымен кәмелетке толмағандардың қылмыстық жауапкершілігі, құқық бұзушылықтарға делдал болу, сыбайлас жемқорлық тәуекелдері, кибербуллинг және интернет-алаяқтық тақырыптары талқыланды. Аталған мәселелер қазіргі қоғам үшін өзекті саналады.
Ал 10–11 сынып оқушыларына құқық қорғау органдарының қызметкерлері 18 жастан бастап туындайтын қылмыстық және әкімшілік жауапкершілік ерекшеліктерін түсіндіріп, цифрлық ортадағы қауіптер мен құқықтық жауапкершілік туралы ақпарат берді.
Сонымен қатар 5-ші және 8-сынып оқушыларымен заңды сақтау мәдениетін ерте жастан қалыптастыруға бағытталған профилактикалық кездесулер өткізілді.
Білім басқармасының хабарлауынша, аталған іс-шараларға 60 мыңнан астам оқушы мен педагог, сондай-ақ 54 құқық қорғау органының қызметкері қатысқан.
