Шығыс Қазақстан облысының Шемонаиха ауданында пайдалы қазбаларды заңсыз өндіріп, Қытайға өткізген компания анықталды. Бұл туралы Қаржы мониторингі агенттінің баспасөз қызметі мәлім етті, деп хабарлайды F16.kz.
Сот материалдарына сүйенсек, ЖШС басшысы «Глинковское» кен орнында пайдалы қатты қазбаларды заңсыз өндірген және өткізген. Ал компанияға лицензия тек геологиялық барлау жұмыстарын жүргізуге берілген, пайдалы қазбаларды өнеркәсіптік көлемде өндіруге рұқсат болмаған.
Соған қарамастан құрамында темір кені бар тау жынысын өндіріп, өңдеп, жинап және оны ішкі нарықта өткізген, сондай-ақ Қытай Халық Республикасына шығарған. Кен қазу кезінде ауыр арнайы техниканы қолдану қоршаған ортаға кері әсер етіп, жер бедерінің бұзылуына және топырақтың тозуына әкеп соққан, — деп хабарлады ҚМА.
Заңсыз өндірілген өнімнің жалпы көлемі 70 мың тоннадан асқан. Қылмыстық жолмен келген табыс көлемі – 1 млрд теңге. Бұл ақшаға күдіктілер бизнес-орталық, Алматы қаласынан пәтер, LAND ROVER RANGE ROVER маркалы автокөлік, екі автотұрақ орны және екі жер телімін сатып алған. Сот санкциясымен аталған дүние-мүлікке тыйым салынды.
Айта кетейік, бұған дейін ҚМА ШҚО бойынша департаменті Ұлан ауданының Шыбынды, Самар ауданының Кеңқарын» учаскелерінде ауыр арнайы техника мен өнеркәсіптік жабдықтарды пайдаланып, алтынды заңсыз өндірумен айналысқан екі қылмыстық топтың қызметін тоқтатқан. Заңсыз әрекет салдарынан орман оталып, өзен арналары бұзылған, топырақтың құнарлы қабаты бүлінген. Заңсыз кен өндіруді тоқтату табиғи ортаның одан әрі бүлінуінің алдын алып, өңірдің экологиялық қауіпсіздігіне төнген қатерді жоюға мүмкіндік берді.
