Бұл туралы Конституциялық реформалар жөніндегі комиссияның екінші отырысында әділет министрі Ерлан Сәрсембаев айтты, деп хабарлайды F16.kz.
Сонымен:
Вице-президент өкілді органның депутаты, саяси партиялардың мүшесі бола алмайды. Сонымен қатар ақылы лауазымдар атқаруға, кәсіпкерлік қызметпен айналысуға құқығы жоқ.
Вице-президент Мемлекет басшысының тапсырмасымен елдің сыртқы өкілдігін қамтамасыз етуге, негізгі мемлекеттік институттармен өзара іс-қимыл жасауға, сондай-ақ азаматтық қоғаммен, ғылыми, мәдени және сараптамалық қауымдастықтармен диалогты дамытуға міндетті. Бұл өкілеттіктер негізгі сипатта болып, қажет болған жағдайда Президент тарапынан нақтылануы мүмкін.
Егер вице-президент Президент өкілеттіктерін өзіне қабылдай алмаса, онда өкілеттік Құрылтай төрағасына, ал ол да мүмкін болмаса, Премьер-министрге өтеді.
Президент өкілеттіктерін қабылдаған тұлға сәйкесінше вице-президент, Құрылтай төрағасы, Премьер-министр лауазымдарынан босатылады. Бұл жағдайда бос мемлекеттік лауазымдар Конституцияда көзделген тәртіппен алмастырылады. Қоғам үшін бұл сыртқы немесе ішкі жағдайларға қарамастан тұрақтылықты және мемлекеттің заңды және жүйелі түрде әрекет ететіндігіне толық сенімділікті білдіреді, — деп атап өтті Ерлан Сәрсембаев.
