Шығыс Қазақстан облысында қосымшалар арқылы ақша ұрлау фактілері жиілеп барады. Алаяқтар «Қазақтелеком» атын жамылып адамдарға хабарласа бастады. Бұл туралы облыстың полиция департаменті ескертті деп хабарлайды F16.kz.
Алаяқтар телефонға қоңырау шалып, өздерін «Қазақтелеком» қызметкері ретінде таныстырады. Байланыс қызметіне жасалған келісімшарттың мерзімі аяқталғанын хабарлайды немесе «ерекше» жеңілдіктер ұсынады. WhatsApp мессенджері арқылы «деректерді жаңарту» немесе «жеңілдікті іске қосу» үшін сілтеме жібереді. Сілтеме арқылы өткеннен кейін телефонға зиянды файл (APK) жүктеледі. Оны орнатқан сәттен бастап қылмыскерлер сіздің банк қосымшаларыңыз бен жеке деректеріңізге қашықтықтан қол жеткізеді.
Шабуыл белгілері: телефон қатты қызып кетеді, экран бұғатталып немесе басқару командаларына жауап бермей қалуы мүмкін.
Мұндай жағдайда:
- Телефонды қуат батырмасын ұзақ басып толық өшіріңіз;
- SIM-картаны шығарып, интернеттен ажыратыңыз (Wi-Fi роутерін өшіру).
- Мүмкіндік болса, аккумуляторды алып тастаңыз;
- Басқа құрылғы арқылы банкпен шұғыл байланысып, барлық шоттар мен карталарды бұғаттаңыз;
- 102 нөмірі бойынша полицияға хабарласыңыз.
Байланыс операторларының қызметкерлері ешқашан мессенджер арқылы үшінші тарап қосымшаларын орнатуға арналған сілтемелер жібермейтінін есте сақтау керек.
