Шығыс Қазақстан облысының Үлкен Нарын ауылында заманауи қонақүй ашылды. Жаңа нысан «Ауыл аманаты» жобасы аясында іске қосылды, деп хабарлайды F16.kz.
Қонақүйдің иесі — кәсіпкер Заузат Абраимова. Бұл бастама ауданның туристік әлеуетін арттырып, ауыл экономикасына тың серпін береді дейді мамандар.
Қонақүй 20–25 қонақты қабылдауға арналған жайлы нөмірлермен жабдықталған. Әр бөлмеде ыстық және суық су ағып тұр, жататын және жуынатын бөлмелері бар, санитарлық талаптар қарастырылған. Ғимараттың төменгі қабатында келушілерге арналған дәмхана жұмыс істейді. Мұнда қонақтар ұлттық және жергілікті тағамдардан дәм тата алады.
«Ауыл аманаты» жобасы бізге өз ісімізді бастауға үлкен мүмкіндік берді. Біздің мақсатымыз – Үлкен Нарынға келетін қонақтарға сапалы қызмет ұсынып, аудан туризмін дамытуға үлес қосу. Сонымен қатар жергілікті тұрғындарға жаңа жұмыс орындарын ашу – басты басымдықтардың бірі. Алдағы уақытта қызмет көрсету аясын кеңейтуді жоспарлап отырмыз, – дейді кәсіпкер Заузат Абраимова.
«Алтын адам» қонақүйінің ашылуы – мемлекеттік қолдау мен партиялық жобалардың ауылдағы нақты нәтижесін көрсететін табысты бастама.
